வைரமுத்துவின் பெய்யென பெய்யும் மழை கவிதை தொகுப்புகள் - விதைச்சோளம்

நண்பர் ஒருவர் ப்ளோக்கரில் வைரமுத்துவின் "பெய்யென பெய்யும் மழையை"சிலாகித்து எழுதி இருந்தார், அவர் கவிதைகள் படித்து இருந்தாலும் இந்த புத்தகம் படித்தது இல்லை, அதனால் அப்படி என்னதான் உள்ளது என்ற ஆர்வ உந்துதலில் அந்த கவிதை புத்தகத்தை வங்கி வாசித்தேன் ..... வாசித்தேன் என்பதை விட வாசிப்பில் எனை மறந்தேன் என்பதே உண்மை...தமிழின் வளமையும் அருமையும் , அதன் மீது வைரமுத்துவிற்கு உள்ள ஆளுமையும் அற்புதமாக உள்ளது, அந்த கவிதை தொகுப்பை ஒன்றன் பின் ஒன்றாக எனது ப்ளோக்கரில் வெளியிட உள்ளேன்.புத்தகம் படிக்க கிடைகாதவற்கும் அந்த கவிதைகள் சென்று சேர வேண்டும் என்ற ஆவலில் ........
இனி கவிதைகள்.......



விதைச்சோளம் :-

ஆடி முடிஞ்சிருச்சு
ஆவணியும் கழிஞ்சுருச்சு
சொக்கிகொளம் கோடாங்கி
சொன்னகெடு கடந்துருச்சு

காடு காஞ்சிருச்சு
கத்தாழை கருகிருச்சு
எலந்த முள்ளெல்லாம்
ஏழையோட உதிந்துருச்சு

வெக்க பொறுக்காம
றெக்க வெந்த குருவிஎல்லாம்
வெங்காடு   விட்டு
வெகுதூரம் போயிருச்சு

பொட்டு மழை பெய்யலையே
புழுதி அடங்கலியே
உச்சி நனையலையே 
உள்காடு உழுகலையே

வெதப்புக்கு விதியிருக்கோ
வெறகாக விதியிருக்கோ
கட்டிவச்ச வெங்கலப்பை 
கண்ணீர் வடிச்சிருச்சே

காத்துல ஈரமில்ல
கள்ளியில பாலுமில்ல
எறும்பு குளிச்சேற
இருசொட்டுத் தண்ணியில்ல

மேகம் எறங்கலியே
மின்னல் ஒன்னும் காங்கலையே  
மேற்க கருக்கலையே
மேகாத்து  வீசலையே

தெய்வமெல்லாம் கும்பிட்டுத்
தெசையெல்லாம் தெண்டனிட்டு
நீட்டிப் படுக்கையில்
நெத்தியில ஒத்தமழை

துட்டுள்ள ஆள் தேடி 
சொந்தமெல்லாம் வாரதுபோல்
சீமைக்குப்  போயிருந்த 
மேகமெல்லாம் திரும்புதையா

வாருமய்யா  வாருமய்யா
வருண பகவானே
தீருமய்யா தீருமய்யா 
தென்னாட்டுப்  பஞ்சமெல்லாம்

ஒத்தஏரு நான் உழுகத்
தொத்தப்பசு வச்சிருக்கேன்
இன்னும் ஒரு மாட்டுக்கு
எவனப் போய் நான் கேட்பேன் ?

ஊரெல்லாம் தேடி 
ஏர்மாடு இல்லாட்டி
இருக்கவே இருக்கா
இடுப்போடிஞ்ச பொண்டாட்டி 


காசு பெருத்தவளே
காரவீட்டுக்   கருப்பாயி
தண்ணிவிட்டு எண்ணைணு  
தாளிக்கத் தெரிஞ்சவளே

சலவைக்குப் போட்டாச்
சாயம்  குலையுமினு  
சீல  தொவைக்காத
சிக்கனத்து மாதரசி 

கால்மூட்ட வெதைசோளம் 
கடனாகத் தா தாயி
கால்மூட்ட கடனுக்கு
முழுமூட அளக்குறண்டி
 
ஊத்துதடி ஊத்துதடி
ஊசிமலை ஊத்துதடி
சாத்துதடி சாத்துதடி
சடைசடையாய் சாத்துதடி 

பாழும் மழைக்குப்
பைத்தியமா புடிச்சிருச்சு?
மேகத்தைக்   கிழிச்சு  
மின்னல்கொண்டு  தைக்குதடி  

முந்தாநாள்  வந்தமழை
மூச்சுமுட்டப் பெய்யுதடி
தெசைஏதும் தெரியாம
தெரைபோட்டு கொட்டுதடி

கூரை ஒழுகுதடி 
குச்சுவீடு நனையுதடி
ஈரம்  பரவுதடி
ஈரக்கொல நடுங்குதடி

வெள்ளம் சுத்திநின்னு
வீட்ட இழுக்குதடி
ஆஸ்தியில் சரிபாதி
அடிச்சுகிட்டு போகுதடி

குடிகொடுத்த காத்து
கூர பிரிக்குதடி 
மழைதண்ணி  ஊறி
மஞ்சுவரு கரையுதடி

நாடு நடுங்குதய்யா 
நச்சுமழை போதுமையா
வெதைவெதைக்க  வேணும்
வெயில்கொண்டு வாறுமய்யா  

மழையும்  வெறிக்க
மசமசன்னு வெயிலடிக்க
மூலையில் வச்சிருந்த
மூட்டையைப் போய் நான் பிரிக்க

வெதச்சோளம் நனைஞ்சுருச்சே
வெட்டியாப் பூத்திருச்சே
மொளைக்காத படிக்கு
மொளைக்கட்டிப் போயிருச்சே

ஏர்புடிக்கும்  சாதிக்கு
இதுவேதான் தலைஎழுத்தா ?
விதிமுடிஞ்ச  ஆளுக்கே 
வெவசாயம் எழுதிருக்கா?

காஞ்சு கெடக்குதுன்னு 

கடவுளுக்கு  மனுசெஞ்சா
பேஞ்சு கேடுத்திருச்சே  
பெருமாளே என்னபண்ண? 

இது விவசாயத்தின்  நிலைமையை ஒரு விவசாயியின் கண்ணோட்டத்தில் சொன்னது....