வைரமுத்துவின் பெய்யென பெய்யும் மழை கவிதை தொகுப்புகள் IV - வாழ்க்கை

முதல்பாகம் :-

கனவு நுரைக்கும் கண்கள் 

காற்றின் சுதந்திரம்

தொட்டுப் பார்க்க பறவைகள்
பட்டுத் தோல் நாய்க்குட்டி

கொஞ்சம் பிசாசுக் கதைகள்
சிறகு முளைத்த குதிரைக் கனவுகள்

திட்டாத மாதா
அடிக்காத பிதா
கிள்ளாத குரு

தலைபுதைத்துறங்கப் பாட்டிமடி  

மீதிச்சில்லரை   கேட்காத தாத்தா
ஆசைத் தின்பண்டம்
அத்தைமார் முத்தம்

இரண்டாம் பாகம்:-

இருளின் நிறத்தில்
ஒளிகொண்ட  மீசை

இஸ்த்ரிபோட்ட மேகம் போல்
உடம்பில் படியும் உடை

அதிகாலைத் தூக்கம்
அடிக்காத அலாரம்

அழகாய்க் காட்டும் கண்ணாடி
கதவில்லாத குளியலறை

ஜன்னலுக்குள் மூக்குநுழைத்துக்
கிளைகளும் தலையாட்டி
பாடம் கேட்கும் வகுப்பறை

ஒருமுறை பயின்றால்
உள்வாங்கும் மூளை

தோல்விக்கான  காதல்
ஒன்றிரண்டு

வெற்றிக்கான காதல்
ஒன்று

சேமிக்கும் உத்தியோகம்
செலவழிக்காத இளமை
இரைச்சலற்ற கல்யாணம்

மூன்றாம் பாகம்:-

சுயாட்சியான  தாம்பத்யம்

மல்லிகைபூச் சூட்டாமல் 
புரிந்துகொள்ளும் மனைவி

உப்பு மூட்டை சுமக்க
ஓரிரண்டு பிள்ளைகள்

நாட்கள் என்னும் முன்
விடைபெறும் விருந்து

நேர்வழி வந்த நிறைபொருள்

சொந்தச் செலவில் பயணங்கள்

தான்செய்த தவறொன்றும்
செய்யாத பிள்ளைகள்

தனது சாயலில் பிறந்த பேரன்கள்

நான்காம் பாகம்:-

வளையாத கைத்தடி
வலுக்கத குளியலறை

செரிக்கின்ற உணவு
சீரகத் தண்ணீர்

உயரம் குறைந்த தலையணை
குறட்டை சகிக்கும் மனைவி

சிறுநீர் வந்து
அடிக்கடி முட்டாத ஆழ்தூக்கம்

இப்போது கன்னிகழிக்க
எப்போதோ வாங்கிய புத்தகங்கள்

அசையாப் பற்கள்
ஆடாத் தலை

பிரியாத நாய்
பேத்திகளின் ஸ்பரிசம்

வைத்தியம் பார்க்க சொந்தப்பணம்

சுத்த சைவம்
சுடாத வெந்நீர்

சொல்லாத தவறுகள்
சொல்லிச்  சுவைக்கப்
பழைய தோழர்கள்

மரணத்தை வரவேற்று
விசிலடிக்கும் மனசு

அடங்கிய பின்னும்
சிரித்த முகம்

பட்டியல் இதனில்
பாதியடைந்தால்
நீதான் ராஜா

பாதிக்கு மேலென்றால்
சக்கரவர்த்தி

முற்றுமடைந்தால்
நீதான் கடவுள்.